ᓱᕐᕋᖕᓇᖅᑐᑦ ᐅᐃᕆᓐᓇᖅᑐᐃᓪᓗ

ᓱᕐᕋᖕᓇᖅᑐᓂ ᐅᐃᕆᓯᒪᓂᑦ ᐊᔪᕐᓇᖅᑐᖅᓯᐅᕐᓇᖅᑐᒥ ᐋᓐᓂᐊᖑᕗᖅ, ᐅᐃᕆᓐᓇᖅᖢᑎᒡᓗ ᓱᕐᕋᖕᓇᖅᑐᑦ ᐊᒻᒪᓗ ᐋᖓᔮᕐᓇᖅᑐᑦ ᐊᐅᓚᔾᔭᒃᓯᔪᓐᓴᕐᒪᑦ ᖃᕋᓴᐅᑉ ᖃᓄᐃᓕᖓᓂᖓᓂᒃ ᐊᒻᒪᓗ ᐊᒃᑐᐊᓂᖃᖅᑐᖅ ᑖᒃᑯᓂᖓ ᐊᓯᔾᔨᖅᐸᓪᓕᐊᔭᖏ ᐊᑯᓂᐅᔪᓐᓇᖢᓂᓗ. ᑭᓯᐊᓂ ᓄᖃᕐᓂᖅ ᐊᔪᕐᓇᕋᓗᐊᖅᑎᓪᓗᒍ, ᐃᑲᔪᖅᑕᐅᔪᒪᓂᖅ ᐊᒻᒪᓗ ᐃᑲᔪᖅᑕᐅᓂᖅ ᐊᑐᐃᓐᓇᐅᔪᑦ ᒪᒥᓴᕐᓂᕐᒧᑦ.  ᓱᕐᕋᖕᓇᖅᑐᒧᑦ ᐅᐃᕆᓯᒪᓂᖅ ᑲᔪᓯᓂᖃᑦᑎᐊᖅᑐᒃᑯᑦ ᒪᒥᓴᖅᑕᐅᔪᓐᓇᖅᑐᖅ. ᐃᓚᖏᑦ ᐅᐃᕆᓯᒪᓂᑯᐃᑦ ᒪᒥᓯᒪᓕᕈᓐᓇᖅᑐᑦ ᐊᒻᒪᓗ ᐃᓅᖏᓐᓇᕐᓗᑎᒃ, ᖁᕕᐊᓱᒡᓗᑎᒃ ᐊᒻᒪᓗ ᐋᓐᓂᐊᖃᕐᓇᖅᑕᐃᓕᒪᓂᕐᒧᑦ ᐃᓅᓯᖃᕐᓗᑎᒃ. 

ᐋᓐᓂᐊᖑᔪᓕᒫᑎᑐᑦ, ᐅᐃᕆᓯᒪᓂᖅ ᐊᔾᔨᖃᐸᓗᒃᑐᑦ ᓇᓗᓇᐃᖅᑕᐅᔪᓐᓇᖅᑐᓂ. ᐊᔪᕐᓇᖅᑐᖅᓯᐅᕈᑎᖃᖅᑐᖅ ᓱᕐᕋᖕᓇᖅᑐᓂ ᐅᐃᕆᓯᒪᓂᕐᒧᑦ ᐊᑕᐅᓯᕐᒥᑦ ᐅᕝᕙᓘᓐᓃᑦ ᐅᓄᖅᑐᓂ ᖃᓄᐃᓕᖓᔾᔪᓯᖃᕋᔭᖅᑐᖅ:

  • ᖃᐅᔨᖃᑦᑕᖅᓯᒪᓇᔭᖅᑐᖅ ᐊᔪᕐᓇᖅᑐᖅᓯᐅᖃᑦᑕᕐᓂᕐᒥᑦ ‘ᐋᒃᑳᖃᑦᑕᕐᓂᕐᒥᑦ’ ᐊᑐᐃᓐᓇᐅᑎᑦᑎᔪᖃᓕᕌᖓ ᓱᕐᕌᖕᓇᖅᑐᓂᑦ
  • ᐃᓚᐅᖃᑕᕐᓂᖅᓴᐅᓕᕐᓗᓂ ᐊᑐᖃᑦᑕᖅᑐᓕ ᓱᕐᕋᖕᓇᖅᑐᓂᑦ
  • ᕿᒪᒃᓯᑐᐃᓐᓇᕐᓂᖅ ᐃᓅᖃᑎᒌᖏᓐᓂ ᓲᕐᓗ ᐃᓚᖏᓐᓂ ᐱᖃᓐᓇᕆᔭᖏᓐᓂᓗ
  • ᐊᑐᖃᑦᑕᖅᑐᑦ ᓱᕐᕋᖕᓇᖅᑐᓂ ᓵᖓᔪᓐᓇᕐᓂᕐᒧᑦ ᑲᑉᐱᐊᒋᔭᖏᓐᓂ, ᓂᙵᐅᒪᔾᔪᑎᒋᔭᖏᓐᓂᑦ, ᓂᑲᓪᓗᖓᓂᕐᒧᑦ, ᓄᒫᓱᖕᓂᕐᒧᑦ, ᐊᒻᒪᓗ ᐊᓯᖏᑦ ᐊᑲᐅᖏᓕᐅᕈᑎᒥᖕᓂ
  • ᖃᐅᔨᖃᑦᑕᕐᓂᖅ ᐊᑲᐅᖏᓕᐅᕈᑎᓂᒃ ᐊᒻᒪᓗ ᐱᔪᓐᓇᕐᓂᐅᔪᓂ ᐋᓐᓂᖅᓱᖅᑕᐅᖃᑦᑕᕐᓂᕐᒧᑦ ᐃᓅᖃᑎᒥᖕᓂᒃ ᐊᑐᖅᓯᒪᓪᓗᑎᒃ ᐋᖓᔮᕐᓇᖅᑐᓂ
  • ᐱᕈᖅᑎᑦᑎᓇᖅᑐᖅ ᓱᖏᐅᑦᑎᓂᕐᒥᑦ ᓱᕐᕋᖕᓇᖅᑐᓂ ᐅᕝᕙᓘᓐᓃᑦ ᐲᓐᓇᕆᐊᖃᕋᓱᒋᓕᓲᖑᔪᑦ ᓱᕐᕋᒍᑎᒋᕙᒃᑕᖏᓐᓂᑦ
  • ᐱᔪᓐᓃᖅᐸᖅ ᖃᐅᔨᔾᔪᓯᖃᑦᑕᕋᔭᖅᑐᖅ ᐅᕝᕙᓘᓐᓃᑦ ᐃᖢᕆᔪᓐᓃᖃᑦᑕᕋᔭᖅᑐᖅ ᐊᑐᕈᓐᓃᕌᖓ ᓱᕐᕋᖕᓇᖅᑐᓂᑦ
  • ᐃᓱᒪᒌᓐᓇᖃᑦᑕᕐᓂᖅ ᐊᒻᒪᓗ ᐱᓕᕆᖃᑦᑕᕐᓗᓂ ᐱᒃᑲᓐᓂᕈᑎᒃᓴᒥᓂᒃ
  • ᑮᓇᐅᔭᖏᑦ ᓱᕐᕋᖕᓇᖅᑐᓄᑦ ᐊᑐᖃᑦᑕᕐᓗᓂᒋᑦ, ᐊᓯᖏᓐᓄᑦ ᐊᑐᕆᐊᖃᕋᓗᐊᖅᐸᑦ ᑮᓇᐅᔭᖏᑦ
  • ᓱᕐᕋᖕᓇᖅᑐᓂᑦ ᐃᓱᒪᐃᓐᓇᖃᑦᑕᕐᓂᖅ ᐊᒻᒪᓗ ᖃᖓ ‘ᓱᕐᕋᒃᑲᓐᓂᓛᕐᒪᖔ’
  • ᐊᑐᐃᓐᓇᖃᑦᑕᓕᕋᔭᖅᑐᖅ ᓱᕐᕋᖕᓇᖅᑐᓂ ᖃᐅᔨᒪᒐᓗᐊᖅᐸᑦ ᓱᕐᕋᖕᓇᖅᑐᓂ ᐊᑐᖃᑦᑕᕋᓗᐊᖅᐸᑦ ᐱᔾᔪᑕᐅᔪᓐᓇᖅᑐᖅ ᐊᖏᔪᒥᑦ ᐊᑲᐅᖏᓕᐅᕈᑎᓂᒃ ᐃᓅᓯᖏᓐᓂᒃ ᐊᒻᒪᓗ ᐃᒃᐱᒋᓛᖏᑦ ᐃᓅᓯᖏᓐᓄᑦ

ᐊᓯᖏᑦ ᓂᕈᐊᖃᑦᑕᖅᑐᑦ ᓱᕐᕋᖕᓇᖅᑐᓂ ᐱᔪᓐᓇᐅᑎᖃᖏᑦᑐᓂᒃ. ᐊᑐᖅᑕᐅᒐᔪᒃᑐᖅ ᑐᑭᓕᐅᕆᓗᒍ ᓱᕐᕋᖕᓇᖅᑐᑦ ᐱᔪᓐᓇᐅᑎᖃᖏᑦᑐᑦ ᐱᖃᓯᐅᑎᓯᒪᔪᑦ ᑕᖄᓂ ᓱᕐᕋᖕᓇᖅᑐᖅᑖᕆᔭᐅᕙᒃᑐᑦ ᓲᕐᓗ ᓇᕆᐅᖅᓴᒐᒃᓴᖅ ᐆᓯᒪᓪᓗᓂ, ᓇᕆᐅᖅᓴᖅᑕᐅᓲᖅ,ᑲᐴᑎᒧᑦ ᓱᕐᕌᒍᑕᐅᕙᒃᑐᑦ, ᐄᔭᒐᖅ ᐋᖓᔮᕈᑕᐅᔪᓐᓇᖅᑐᖅ, ᐅᖃᐅᑉ ᐊᑖᒍᑦ ᐄᔭᒐᖅᑕᐅᓲᖅ ᓱᕐᕋᖕᓇᖅᑐᑦ. ᑖᒃᑯᐊ ᒪᓕᒐᓕᐅᖅᑕᐅᓯᒪᖏᑦᑐᑦ ᐊᒻᒪᓗ ᐃᓚᖃᑐᐃᓐᓇᕆᐊᓖᑦ ᖃᐅᔨᒪᔭᐅᖏᑦᑐᓂ ᐋᓐᓂᐊᓕᕐᓇᖅᑐᓂ ᐃᓚᒃᓴᖏᑦ. ᑖᒃᑯᐊ ᐱᕋᔭᒃᑐᓄᑦ ᑎᒍᔭᐅᓯᒪᔪᓐᓇᖅᑐᑦ ᑎᒍᒥᐊᕐᓂᕈᑎᒃ, ᓂᐅᕕᐊᒃᓴᖃᕐᓂᕈᑎᒃ ᐅᕝᕙᓘᓐᓃᑦ ᐊᑐᕐᓂᕈᑎᒃ ᓇᓕᐊᖕᓂᑐᐃᓐᓇᖅ ᓱᕐᕋᖕᓇᖅᑐᓂᒃ. 

ᐃᓅᓕᓴᖅᑕᐅᖏᒃᑯᑎᒃ, ᓱᕐᕋᖕᓇᖅᑐᓄᑦ ᐅᐃᕆᓯᒪᔪᑦ ᐱᐅᖏᑦᑐᓂ ᐊᒃᑐᖅᑕᐅᓇᔭᖅᑐᖅ ᓇᖕᒥᓂᕐᒧᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᖃᓄᐃᖏᑦᑎᐊᕐᓂᕐᒧᑦ. ᑖᑯᐊ ᐃᓚᖃᑐᐃᓐᓇᕆᐊᓖᑦ:

  • ᑮᓇᐅᔭᒥᑦ ᐊᔪᖅᓴᖃᑦᑕᕐᓂᖅ
  • ᐅᖓᓯᒡᓕᒋᐊᕐᓂᖅ ᐃᓅᖃᑎᒥᖕᓂᑦ ᐱᔾᔪᑎᖃᕐᓗᓂ ᓴᕋᖕᓇᖅᑐᓂ ᐊᒻᒪᓗ ᐋᓐᓂᕐᓇᖅᑐᓂ ᐃᓕᖁᓯᖃᓕᕐᓂᕐᒥᑦ
  • ᐃᓕᓐᐊᖅᑕᒥᓂᒃ ᐅᕝᕙᓘᓐᓃᑦ ᓴᓈᒥᓄᑦ ᐅᐸᑦᑎᐊᖃᑦᑕᕈᓐᓃᕐᓂᖅ
  • ᐱᕋᔭᖕᓂᕐᒧᑦ ᐃᖃᖅᑐᒐᒃᓴᖕᙳᖅᑎᑕᐅᓂᖅ ᐅᕝᕙᓘᓐᓃᑦ ᑎᒍᔭᐅᓯᒪᑎᑕᐅᓂᖅ
  • ᐊᒃᑐᐊᓂᖃᖅᑎᑦᑎᖏᓐᓂᖅ ᑎᒥᒃᑯᑦ ᐃᓱᒪᒃᑯᓪᓗ ᐃᓚᒋᔭᖏᓐᓄᑦ ᐱᔭᕆᐊᖃᖅᑕᖏᓐᓂ
  • ᐅᓗᕆᐊᓇᖅᑐᓂ ᐊᓐᓂᐊᖅᑖᕐᓂᖅ ᐅᕝᕙᓘᓐᓃᑦ ᐃᓅᔪᓐᓃᖅᓵᓕᓂᖅ

ᖃᐅᔨᔭᐅᔪᓐᓇᖏᑦᑐᖅ ᖃᓄᖅ ᐅᐃᕆᓯᒪᔪᑦ ᐱᒋᐊᖃᑦᑕᕐᓂᖓ. ᖃᐅᔨᒪᔭᑦᑎᓐᓂ, ᐃᓚᒌᑦ ᐋᕿᒃᓯᒪᓂᖏ, ᐊᕙᑎᒥᒃ, ᐃᓱᒪᒃᑯᑦ ᖃᓄᐃᖏᑎᐊᕐᓂᕐᒧᑦ ᐊᑲᐅᖏᓕᐅᕈᑎᖃᖅᑐᑦ, ᐊᔪᕐᓇᖅᑐᖅᓯᐅᖃᑦᑕᖅᑐᑦ ᐃᓱᒪᒥᒍᑦ ᐊᒻᒪᓗ ᐃᒃᐱᒍᓱᖕᓂᖏᒍᑦ ᐊᐅᓚᓂᕆᖃᑦᑕᑐᐃᓐᓇᕆᐊᓖᒃ ᐱᕙᓪᓕᐊᓂᕐᒧᑦ ᐅᐃᕆᓯᒪᓂᕐᒧᑦ. 

ᐃᑲᔪᕐᓂᖅ ᐊᒻᒪᓗ ᐃᑲᔪᖅᓱᕐᓂᖅ ᐅᐃᕆᓯᒪᔪᓂᑦ

ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᐊᑐᐃᓐᓇᐅᑎᑦᑎᔪᑦ ᓄᓇᓕᖕᓄᑦ, ᐊᕕᒃᑐᖅᓯᒪᔪᓄᑦ, ᐊᒻᒪᓗ ᐊᕕᒃᑐᖅᓯᒪᔪᑦ ᓯᓚᑖᓄᑦ ᐱᔨᑦᑎᕋᕐᓂᕐᒥᑦ ᐃᑲᔪᕐᓗᑎᑦ ᖃᐅᔨᔭᐅᓗᑎᒃ ᐊᒻᒪᓗ ᐃᓅᓕᓴᕐᓗᒋᑦ ᐊᒃᑐᖅᑕᐅᓯᒪᔪᑦ ᐃᒥᐊᓗᖕᓂᕐᒧᑦ ᐋᓐᓂᖅᑕᐅᓯᒪᔪᑦ ᐅᕝᕙᓘᓐᓃᑦ ᐊᑲᐅᖏᓕᐅᕈᑎᖃᖅᑐᑦ ᐅᐃᕆᓯᒪᓂᕐᒧᑦ.

ᖃᐅᔨᒪᔭᖃᕈᕕᑦ ᐃᒥᐊᓗᖕᓂᕐᒥᑦ ᐊᑐᕐᓂᕐᓗᖃᑦᑕᖅᑐᒥᑦ ᐅᕝᕙᓘᓐᓃᑦ ᐅᐃᕆᓯᒪᔪᖃᖅᐸᑦ ᐊᑲᐅᙱᓕᐅᕈᑎᖃᖅᑐᒥᑦ, ᐅᖃᖃᑎᖃᕈᓐᓇᖅᐳᑎᑦ ᐃᓗᐊᖅᓴᐃᔨᒥᑦ ᐅᕝᕙᓘᓐᓃᑦ ᓘᒃᑖᒥᑦ ᓄᓇᓕᔅᓯ ᐋᓐᓂᐊᕐᕕᖓᓂᑦ. ᐅᖃᖃᑎᖃᕈᓐᓇᕆᕗᑎᑦ ᓄᓇᓕᒡᓯᓐᓂ ᐃᓄᓕᕆᔨᒧᑦ ᐅᕝᕙᓘᓐᓃᑦ ᐃᓅᓯᖃᑦᑎᐊᕐᓂᕐᒧᑦ ᐅᖃᐅᔾᔪᐃᔨᒥᑦ.

ᐅᖃᓗᒍᓐᓇᕆᕗᑎᑦ ᑲᒪᑦᓯᐊᖅᑐᑦ ᐅᖄᓚᐅᑎᖓᓄᑦ  ᐃᑲᔪᖅᓱᖅᑕᐅᒃᑲᓐᓂᕈᒪᒍᕕᑦ ᐅᕙᓂ (867) 979-3333 ᐅᕝᕙᓘᓐᓃᑦ ᐊᑭᖃᖏᑦᑐᒃᑯᑦ ᐅᕙᓂ (800) 265-3333.

ᓄᓇᕗᒻᒥᑦ, ᐃᒻᒥᓄᑦ−ᐃᑲᔪᖅᑐᐃᕝᕕᒃᑕᖃᕐᒥᔪᖅ ᐱᓕᕆᖃᑎᒌᓄᑦ ᐃᑲᔪᖅᑕᐅᔪᓐᓇᖅᖢᑎᑦ ᐅᐃᕆᓯᒪᓐᓂᕈᕕᑦ ᐅᕝᕙᓘᓐᓃᑦ ᐱᖃᓐᓇᕆᔭᖃᕈᕕᑦ ᐃᕝᕙᓘᓐᓃᑦ ᐃᓚᒋᔭᖃᕈᕕᑦ ᐅᐃᕆᓯᒪᔪᒥᑦ. ᐋᓐᓂᐊᕕᔅᓯᓐᓂᑦ ᐅᖃᖃᑎᖃᕆᑦ ᖃᐅᔨᓇᓱᒡᓗᑎᑦ ᐃᒻᒥᓄᑦ−ᐃᑲᔪᖅᑐᐃᕝᕕᖕᒧᑦ ᐱᓕᕆᖃᑎᖑᔪᑦ ᐊᑐᐃᓐᓇᐅᑎᑦᑎᔪᓇᖅᑐᓂ ᓄᓇᓕᔅᓯᓐᓂᑦ. ᐱᓕᕆᖃᑎᒌᖑᒐᔪᒃᑐᑦ ᐃᓚᖃᖅᑐᑦ:

  • ᐃᒥᐊᓗᒻᒧᑦ ᓄᖅᑲᕋᓱᐊᕐᓂᖅ ᐱᓕᕆᖃᑎᒌᖑᔪᑦ ᓄᖃᕈᒪᔪᓄᑦ ᐃᒥᖃᑦᑕᕐᓂᕐᒥᑦ ᐅᕝᕙᓘᓐᓃᑦ ᐃᑲᔪᖅᓱᕈᒪᔪᓄᑦ ᓄᖅᑲᓚᐅᖅᑎᓪᓗᒋᑦ ᐃᒥᐊᓗᖕᓂᕐᒥᑦ. 

ᑐᑭᓯᒋᐊᒃᑲᓐᓂᕈᒪᒍᕕᑦ :  http://www.aacanada.com/ 

  • ᐃᒥᐊᓗᒻᒧᑦ ᓄᖅᑲᕋᓱᐊᕐᓂᖅ ᐱᓕᕆᖃᑎᒌᖑᔪᑦ ᐃᓚᒌᖑᔪᓄᑦ ᐱᖃᓐᓇᕇᖑᔪᓄᓗ ᑐᕌᖓᓪᓗᓂ ᐃᒥᐊᓗᓕᕆᓂᕐᒧᑦ. 

ᑐᑭᓯᒋᐊᕈᒪᒍᕕᑦ: : http://al-anon.alateen.org/

ᐃᑭᐊᕿᕕᒃᑯᑦ ᖃᐅᔨᒋᐊᕐᕕᐅᔪᓐᓇᖅᑐᖅ ᑐᑭᓯᒋᐊᕈᒪᒍᕕᑦ ᐱᔾᔪᑎᓕᖕᓂᑦ ᐃᒥᐊᓗᒃᓱᕐᕋᖕᓇᖅᑐᑦ, ᐊᒻᒪᓗ ᐃᔭᒐᐃᑦ ᐅᕝᕙᓘᓐᓃᑦ ᐱᔪᓐᓇᐅᑎᖃᖏᑦᑐᓄᑦ−ᓱᕐᕋᖕᓇᖅᑐᑦ−ᓂᐅᕕᐊᒃᓴᕆᔭᐅᕙᒃᑐᑦ ᓲᕐᓗᐋᓯᑕᒦᓅᐸᓐ.

 

ᐃᑲᔫᑎᔅᓴᑦ:

Naloxone Factsheet